ИЗВЕСТУВАЊА
Известување 25.11.2009
Велес ќе засади 26 јапонски украсни цреши во чест на Тоше Проески
Градот Велес ја прифати идејата на ЈП „Македонски Шуми“ за засадување на 26 садници од јапонска украсна цреша во чест на една од најголемите ѕвезди на балканската музичка сцена – Тоше Проески, со што освен што ќе се разубави градот, симболично ќе се претстават неговите 26 години животен век за кои тој остави зад себе непроценливо богатство, љубов, верба и надеж. Оваа иницијатива има за цел прекрасната музика на Тоше, неговите хумани дела и вредностите што ги промовираше засекогаш да останат во сеќавањето на велешани. Изборот за засадување на цреша симболично ќе ги овековечи незаборавните стихови од неговата песна „Цреша“.
Идејата за оваа акција конкретно ќе биде реализирана од страна на ЈКП Дервен, кои ќе оформат хортикултурна целина од 26 садници јапонска украсна цреша во дворот на гимназијата „Кочо Рацин“ во централното градско подрачје, онаму каде младите најчесто се собираат и дружат.
Во моментов вработени од ЈКП Дервен работат на припрема на теренот и обезбедување на заштита за садниците. Со изведување на оваа акција Велес ќе се вброи во неколкуте градови во Македонија кои исто така ја прифатија идејата за овековечување на споменот за трагично загинатата македонска поп ѕвезда.
ИЗВЕСТУВАЊА
Известување 19.05.2020 година
Сметаме дека е потребно да ги известиме граѓаните дека поради состојбата со Корона вирусот, во изминатиов период голем дел од вработените од ЈКП Дервен беа распоредени на дезинфекција на јавните површини, па поради приоритетноста на овие активности, односно заштита на безбедноста и здравјето на граѓаните, косењето на јавните зелени површини се одвива со мало задоцнување. Исто така, работниците кои се хронично болни или се родители на деца до 10 годишна возраст и имаат потреба да останат дома и да се грижат за децата се ослободени од работните обврски, што допринесува активностите да се одвиваат забавено поради намалениот број на работници. Се надеваме дека граѓаните ќе имаат разбирање и трпение и ветуваме дека сите предвидени зелени површини ќе бидат искосени во најбрз можен рок.
Денес, 19.05.2020 година, се косат зелените површини на двете страни од ул. Алексо Демниев и паркот Каршијака, парк Гимназија и парк Офицерски дом.
ИЗВЕСТУВАЊА
Соопштение 10.05.2020
Ги известуваме жителите на ул. Даме Груев дека од 11 Мај почнува поврзување на куќни приклучоци на водоводна линија, поради што од 11 Мај ќе има повремени прекини на водоснабдувањето, во времетраење од околу една седмица.
ИЗВЕСТУВАЊА
ИЗВЕСТУВАЊЕ 19.03.2020
ЈКП Дервен – Велес, поради состојбата со Корона вирусот (КОВИД-19) во државата, Ви соопштува дека во овој период, се додека се во важност препораките и забраните на Владата и Министерството за здравство, а кои се однесуваат на спречување на ширење на Корона вирусот, вработените од ЈКП Дервен кои се задолжени за читање на водомерите нема да влегуваат во објектите во кои водомерите се поставени внатре во простории, за нивна, но и за заштита на самите граѓани.
Се молат граѓаните на Општина Велес редовно да ги плаќаат сметките за комунални услуги, за да може претпријатието непречено да го снабдува населението со вода за пиење, да собира смет и чисти јавни површини, да одржува зеленило и да ги извршува останатите работни активности од интерес за граѓаните.
Граѓаните сметките за комунални услуги може да ги плаќаат и електронски, на официјалната интернет страница на ЈКП Дервен: https://derven.mk/
Се молат граѓаните на Општина Велес, (доколку сакаат истото можат да го направат и оние граѓани чии водомери се наоѓаат надвор од објектите, а не сакаат вработените од ЈКП Дервен да влегуваат во нивните дворови) сами да ја прочитаат состојбата на своите водомери и да известат за истата во ЈКП Дервен на телефонскиот број: 043/231-011, локал 134 и локал 135, од 8.00 до 12.00 часот секој работен ден.
Однапред Ви благодариме.